search

Moskítófluga greind á Íslandi í fyrsta sinn

Moskítóflugan Culiseta annulata, kvenfluga til vinstri og karlfluga til hægri
Moskítófluga (Culiseta annulata) hefur nú greinst á Íslandi í fyrst sinn. Tegundin er útbreidd víða í Evrópu og getur lifað af veturinn á skjólsælum stöðum. Á myndinni er kvenfluga til vinstri og karlfluga til hægri. – Ljósm. Matthías S. Alfreðsson

Náttúrufræðistofnun hefur staðfest að flugur sem fundust í Kjós í síðustu viku eru moskítóflugur af tegundinni Culiseta annulata. Þetta er í fyrsta sinn sem staðfest tilvik af þessari tegund er skráð á Íslandi.

Dagana 16.–18. október birtust þrjár flugur á rauðvínsbandi sem notað er til að laða að fiðrildi á bænum Kiðafelli í Kjós. Flugurnar voru sendar til Náttúrufræðistofnunar til greiningar og í ljós kom að um var að ræða tvær kvenflugur og eina karlflugu af tegundinni Culiseta annulata.

Á myndinni sést rauðvínsband hanga á grein í grenitré.
Á myndinni sést rauðvínsbandið sem moskítóflugurnar birtust á. – Ljósm. Matthías S. Alfreðsson
Björn Hjaltason heldur á krukku með moskítóflugum sem fundust að Kiðafelli í Kjós
Björn Hjaltason fann moskítóflugurnar á rauðvínsbandi að Kiðafelli í Kjós – Ljósm. Matthías S. Alfreðsson

Tegundin er stórvaxin moskítófluga sem er útbreidd víða í Evrópu, meðal annars á Norðurlöndum og í Bretlandi. Hún hefur aðlagað sig fremur köldu loftslagi, lifir veturinn af á fullorðinsstigi og dvelur þá í skjóli, svo sem í útihúsum og kjöllurum. Flugan stingur en er ekki talin hættuleg mönnum þar sem hún ber ekki þekkt smit á þessum slóðum.

Ekki er ljóst hvernig flugan barst hingað en líklegt er að það hafi verið með vöruflutningum. Óvíst er hvort hún hafi numið hér land til frambúðar en allt bendir til þess að hún geti lifað við íslenskar aðstæður. Fundurinn á moskítóflugunni bætist við vaxandi fjölda nýrra skordýrategunda sem greinst hafa hér á landi á síðustu árum, meðal annars vegna hlýnandi loftslags og aukinna flutninga. 

Náttúrufræðistofnun mun fylgjast áfram með framvindu mála og hvetur almenning til að senda inn myndir eða sýni ef flugur sem líkist moskítóflugu verða vart annars staðar á landinu.