Loftmyndir

Unnið er að því að afla nákvæmra loftmynda af öllu Íslandi í þeim tilgangi að útbúa nákvæmt og heildstætt loftmyndakort. Myndirnar eru teknar í 25x25 cm upplausn fyrir allt landið en 10x10 cm upplausn á höfuðborgarsvæðinu og á stóru svæði í kringum Keflavíkurflugvöll. Myndirnar verða aðgengilegar öllum í gegnum kortasjár og vefþjónustur til notkunar í GIS-hugbúnaði. Notendur munu einnig getað halað myndum niður án endurgjalds.

Fyrirtækin Meixner og Hexagon vinna að myndatökunni en gert er ráð fyrir að verkefnið taki þrjú ár (2024–2026).

Loftljósmyndastofa

Á starfsstöð Náttúrufræðistofnunar í Garðabæ er starfrækt loftljósmyndastofa sem sérhæfir sig í ljósmyndun úr lofti, það er úr flugvélum, þyrlum eða flygildum (drónum). Myndvinnslan byggist á myndmælingatækni (e. photogrammetry) sem felst í úrvinnslu mynda til mælinga og þrívíddarnotkunar en á í raun við allar gerðir af myndatöku, eins og af landi eða sjó en ekki aðeins úr lofti. Markmið loftljósmyndastofunnar er að geta boðið vísindamönnum samstarfstofnanna upp á ljósmyndun í góðri upplausn sem hentar til gerðar þrívíddarlíkana og stereóvinnslu í vísindatilgangi.

Flest þrívíddarlíkön stofnunarinnar eru gefin út á Sketchfab.

Eldri loftmyndir

Loftmyndasjá er kortasjá með sögulegum loftmyndum úr safni Náttúrufræðistofnunar. Þar er hægt að skoða breytingar á landslagi og þéttbýli í gegnum tíðina, svo sem hopun jökla, hraunflæði og útbreiðslu gróðurs. Loftmyndasjáin nýtist meðal annars við kennslu, rannsóknir, skipulagsvinnu og sögulega greiningu og getur jafnframt nýst jarðeigendum til að sjá hvernig land þeirra hefur tekið breytingum. Loftmyndasjáin veitir þannig innsýn í þróun landsins í tímans rás, bæði til fróðleiks og hagnýtrar notkunar.

Í loftmyndasafninu má finna:

30.546 myndaramma frá árunum 1973–2000 (allt landið)
10.099 myndaramma frá árunum 1945–1946 (AMS-serían, allt landið)
13.484 myndir frá árunum 1956–1961 (DMA-serían, 80% af landinu)
40 myndir frá árinu 1980 (Hexagon KH9-PC gervihnattasería, 1x1 m upplausn, 80% af landinu)

Notkun myndanna er heimil án endurgjalds samkvæmt skilmálum Náttúrufræðistofnunar um afnot gagna.