Vísindavaka
Vísindavaka er haldin samtímis í helstu borgum Evrópu undir heitinu Researcher‘s Night og hefur verkefnið ýmist verið styrkt af Evrópusambandinu eða íslenskum stjórnvöldum. Markmiðið er að færa vísindin nær almenningi, kynna manneskjurnar á bak við vísindin og vekja athygli á mikilvægi rannsókna- og vísindastarfs í nútímasamfélagi.
Rannsóknamiðstöð Íslands (RANNÍS) hefur staðið fyrir Vísindavöku hér á landi árin 2005–2013 og aftur frá árinu 2018. Náttúrufræðistofnun hefur tekið þátt í henni frá árinu 2006. Í tengslum við þátttöku stofnunarinnar hafa verið gefnir út bæklingar með ítarefni um umfjöllunarefni hverju sinni, auk fræðsluefnis fyrir börn.
