10. desember 2025. Pawel Wasowicz: Landnám plantna á Surtsey í ljósi nýrra rannsókna
Pawel Wasowicz grasafræðingur hjá Náttúrufræðistofnun flytur erindið „Landnám plantna á Surtsey í ljósi nýrra rannsókna“ á Hrafnaþingi sem haldið verður á netinu 10. desember 2025 kl. 15:15.
Útdráttur úr erindinu:
Surtsey, sem reis úr úthafinu árið 1963, hefur frá upphafi verið einstakt náttúrulegt tilraunasvæði þar sem vísindamenn hafa fylgst með því hvernig líf nemur land og vistkerfi myndast á nýmyndaðri eyju. Ný rannsókn, sem birtist í Ecology Letters, varpar nýju ljósi á ferla landnáms plantna á eyjunni og kallar á endurskoðun ríkjandi hugmynda um hvernig plöntur berast og festa rætur á nýjum svæðum. Rannsóknin dregur fram mikilvægi samspils dýra og plantna í útbreiðslu lífs og undirstrikar að vistkerfi þróast í flóknu samspili margra þátta fremur en samkvæmt einföldum reglum.
Surtsey er í þessu samhengi einstök náttúruleg tilraunastofa sem gerir vísindamönnum kleift að rannsaka grunnferli lífsins í beinni, til dæmis hvernig tegundir nema land, þróast og aðlagast í umhverfi sem er stöðugt að breytast. Slíkar langtímarannsóknir eru ómetanlegar fyrir skilning okkar á framtíð vistkerfa í heimi þar sem loftslag og landnotkun taka örum breytingum.