search

Nýtt stofnmat fyrir íslenska refastofninn

Myndin sýnir ref, fullorðna læðu af hvíta litarafbrigðinu, sem nýtur lífsins á óðali foreldra sinna án þess að bera ábyrgð á viðhaldi óðals og fæðuöflun fyrir ungviði.
Gelddýr eru kynþroska refir sem taka ekki þátt í tímgun. Hlutfall þeirra meðal kynþroska dýra er mikilvæg breyta þegar lagt er mat á viðkomu stofnsins. Þessi fullorðna læða, af hvíta litarafbrigðinu, heldur til á óðali foreldra sinna en tekur ekki þátt í viðhaldi óðalsins eða fæðuöflun fyrir yrðlinga. – Ljósm. Ester Rut Unnsteinsdóttir

Nýtt stofnmat Náttúrufræðistofnunar bendir til þess að fullorðnum refum hafi fækkað á tímabilinu 2011–2024. Samkvæmt matinu voru um 4.700 fullorðin dýr í íslenska refastofninum vorið 2024, en vorið 2011 var stofninn metinn um 7.800 dýr.

Í nýja stofnmatinu er stofnstærð metin að vori, þ.e. fjöldi kynþroska einstaklinga í upphafi tímgunar. Það er breyting frá eldra mati, þar sem stofnstærð var metin að haustlagi og yrðlingar sem fæddust sama sumar voru taldir með.

Stofnlíkanið byggir á veiðigögnum, krufningum og aldursgreiningum innsendra refahræja frá tímabilinu 2011–2024. Niðurstöðurnar verða kynntar nánar á málþingi um íslenska refinn sem fram fer 9. júní 2026.

Fréttatilkynning Náttúrufræðistofnunar