Málþing um íslenska refinn
Málþing um íslenska refinn verður haldið á morgun, þriðjudaginn 9. júní 2026 kl. 13 í Eddu, húsi íslenskunnar. Einnig verður hægt að fylgjast með fundinum í streymi á netinu.
Á málþinginu verður fjallað um ýmsa þætti sem tengjast líffræði íslenska refastofnsins og vöktun hans. Meðal annars verður fjallað um sérstöðu stofnsins, vöktunaraðferðir, erfðafræði og svipgerðir, áhrif hlýnandi loftslags á fæðuval, afræningjatengsl og nýtt stofnlíkan. Þá verður einnig fjallað um refaveiðar og veiðigögn, auk þátttöku refaskyttna í vöktun stofnsins. Að erindum loknum verða pallborðsumræður.
Fundarstjóri verður Sunna Björk Ragnarsdóttir, sviðsstjóri hjá Náttúrufræðistofnun.
Málþingið er opið öllum og aðgangur er ókeypis.
Fyrirlesarar:
Ester Rut Unnsteinsdóttir er spendýravistfræðingur hjá Náttúrufræðistofnun og ber ábyrgð á vöktun íslenska refastofnsins. Ester hefur vaktað refi á Hornströndum frá árinu 1998 en svæðið hefur verið talið eitt mikilvægasta griðland tegundarinnar á Íslandi. Árið 2010 opnaði Ester, ásamt samstarfsaðilum, Melrakkasetur Íslands í Súðavík, fræðasetur um íslenska refinn, líffræði hans og sögu.
Anna Bára Másdóttir er doktorsnemi við Háskóli Íslands og Náttúrufræðistofnun þar sem hún rannsakar svipfarslegan og erfðafræðilegan breytileika íslenska refastofnsins. Í rannsókninni beinir hún sjónum að greiningu kjálkabeina og raðgreiningu erfðamengja til að varpa ljósi á aðlögun og fjölbreytileika stofnsins hér á landi. Doktorsverkefni Önnu Báru er hluti af verkefninu Stofngerð íslenska refsins sem hlotið hefur styrk frá Rannís (styrknúmer 2395591-051).
Sigrún Ninna Sigurðardóttir er líffræðingur með meistaragráðu í umhverfis- og auðlindafræði, með sérstaka áherslu á náttúru, lífríki og verndun þeirra. Meistaraverkefni hennar fjallaði um fæðuval íslenska refsins á Suðvesturlandi yfir 30 ára tímabil, þar sem notuð var greining á stöðugum samsætum úr beinum. Í dag starfar Ninna við fræðslu í Fjölskyldu- og húsdýragarðurinn þar sem börnum á leik- og grunnskólaaldri er veitt fræðsla um dýrin í nærumhverfi okkar.
Nicolas Lecomte er stofnvisfræðingur og prófessor í heimskautavistfræði við Háskólann í New Brunswick í Kanada. Hann hefur starfað við heimskautarannsóknir frá árinu 1998, bæði á Norður- og Suðurskautinu, og sérhæft sig í samskiptum bráðar og afræningja og tengslum innan fæðuvefja. Nicolas hefur unnið að rannsóknum á heimskautarefum í samstarfi við vísindamenn víða um norðurheimskautið.
Bruce McAdam stýrir þróun Bayesian-stofnlíkansins fyrir íslenska refinn. Hann hefur aðsetur í Skotlandi en vinnur um þessar mundir að verkefnum fyrir Náttúrufræðistofnun og Hafrannsóknastofnun, þar sem hann fæst við þróun stofnlíkana fyrir dýrastofna og nýtir gögn úr rafrænum merkjum til að rekja ferðir og staðsetningu fiska. Áður hefur hann komið að gerð fjölbreyttra líkana á sviði náttúru- og umhverfisrannsókna, meðal annars um áhrif loftslagsbreytinga á fiskeldi, stofngerð íslenska þorsksins, eldi hrognkelsa sem nýtt eru sem hreinsifiskar í laxeldi, auk samspils fugla og vindorkuvera.
Skúli Þórðarson starfar sem verkefnastjóri hjá Náttúruverndarstofnun þar sem hann hefur meðal annars umsjón með refa- og minkaveiðum. Starf hans felur í sér samskipti við hagaðila vegna veiðanna, þar á meðal öflun upplýsinga og samningagerð við sveitarfélög um refaveiðar, auk umsjónar með greiðslu mótframlaga vegna refa- og minkaveiða.
Kári Gunnarsson hefur starfað sem refaskytta í Skagafirði samfleytt frá árinu 1986. Hann hefur sérstakan áhuga á breytingum á náttúrufari og lífríki, auk þróunar í refaveiðum og veiðiaðferðum. Þá hefur hann jafnframt áhuga á viðhorfum íbúa til villtrar náttúru og hvernig þau hafa þróast með nýjum kynslóðum, breyttum búskaparháttum og byggðaþróun.