Elín Gunnlaugsdóttir grasafræðingur látin

Elín Gunnlaugsdóttir, grasafræðingur, sem starfaði hjá Náttúrufræðistofnun Norðurlands og Náttúrufræðistofnun Íslands, er látin, 79 ára að aldri.

Elín fæddist 4. júlí 1947. Hún lauk B.S.-prófi í líffræði frá Háskóla Íslands árið 1972 og framhaldsnámi í grasafræði árið 1974. Hún stundaði síðan doktorsnám í plöntuvistfræði og plöntufélagsfræði við Uppsalaháskóla og lauk doktorsprófi þaðan árið 1985. Doktorsrannsókn hennar fjallaði um tegundasamsetningu íslensks heiðagróðurs og breytingar á honum, meðal annars í tengslum við uppblástur og uppgræðslu.

Elín starfaði um langt skeið að gróðurrannsóknum á Norðurlandi. Hún vann meðal annars hjá Náttúrugripasafninu á Akureyri og síðar hjá Náttúrufræðistofnun Norðurlands og Náttúrufræðistofnun Íslands, auk þess að starfa sem grasafræðingur við Lystigarð Akureyrar. Hún rannsakaði gróðursamfélög, einkum við Eyjafjörð, og var meðal helstu sérfræðinga landsins á sviði plöntufélagsfræði. Doktorsritgerð hennar og aðrar rannsóknir hafa haldið gildi sínu og munu áfram nýtast við rannsóknir á íslenskum gróðri.

Elín var fróð, hjálpsöm og hreinskilin og þannig minnast samstarfsfélagar hennar. Náttúrufræðistofnun vottar fjölskyldu hennar og aðstandendum innilega samúð.